Naalakkersuisut siulittaasuat Folketingimut pulaarpoq

28-04-2025 18:38

Pulaarnerup erseqqissarpaa Danmarkip Kalaallit Nunaatalu qanittumik imminnut atassuteqarnerisa aalajangiusimaannarneqarnissaata inerisarneqarnissaatalu pingaaruteqassusia.

Assiliisartoq: Anders Hviid

Ataasinngorneq 28. april Naalakkersuisut siulittaasuat Jens-Frederik Nielsen Folketingimut pulaarpoq.

Jens-Frederik Nielsen apriilip aallartinneranili Naalakkersuisunut nutaanut siulittaasuuvoq.

Folketingimut pulaarnermi Folketingip Siulittaasoqarfia ilasseqatigiissitsivoq Samtaleværelsemi, tassanilu Jens-Frederik Nielsenip Folketingimi ilaasortat takkuttut ilassinissaanut periarfissaqarpoq. Naalakkersuinermi pissutsit aamma oqaluuserinissaat periarfissaqarfigineqarsimavoq, nunat taakku marluk akornanni suleqatigiinneq naalagaaffeqatigiinnermullu apeqqutit ulluni makkunani nalaanneqartut ilanngullugit.

Pulaarnermut atatillugu Folketingip siulittaasua, Søren Gade ima oqaaseqarpoq: »Nuannersuuvoq Naalakkersuisut siulittaasuata Folketingimut tikilluaqqusinnaanera. Pingaartumik piffissami matumani pingaaruteqarpoq naapinnerput attaveqatigiinnerlu uummaaritsillugu. Tamassuma Kalaallit Nunaata Danmarkillu akornanni ataatsimoorneq nukittorsarpaa.«

Ullormi tassani siusinnerusukkut Jens-Frederik Nielsenip ataqqinartorsuaq Kunngi oqaloqatigaa.

Siulittaasup oqalungiaataa

Asasara ministeriuneq, asasara Naalakkersuisut siulittaasuat asasakka ataatsimiititaliat siulittaasui Folketingimilu ilaasortat.

Folketimi siulittaasoqarfik sinnerlugu nuannaarutigeqaara illit - Jens-Frederik - Kalaallit Nunaanni Naalakkersuisut siulittaasuattut Christiansborgimut tikilluaqqusinnaagakkit.

Danmark aamma Kalaallit Nunaat ataatsimut naleqartitaqarlutillu oqaluttuarisaaneqarput.

Naalagaaffeqatigiinnermi qilerutit ataatsimoortitsisigut ukiuni untritilinni arlalinni atuussimapput.

Ilaqutariippugut. Ineriartoqatigiissimavugullu.

Nunatta akornanni attaveqarnitsinni ataatsimoorfivut immikkoorutigullu, tamatigut ataqqeqatigiinnermik tunngaveqartissavagut.

Assigiinngilagut, taamaattorli akaareqatigiillutalu immitsinnut iluaqutigiippugut.

Peqatigitilluguli akuerisariaqarparput ataatsimoorluta oqaluttuarisaanerput ilaatigut ikeqarmat.

Piffissap ilaani aalajangiinerit pisarsimapput, pineqartunut ungasissorujussuarminngaaniit.

Oqaluttuarisaaneq tamanna toqqortissanngilarput - ilinniarfigissavarpulli.

Oqaluttuarisaaneq, isumaga naapertorlugu nunatsinni Naalagaaffeqatigiinnitsinnilu pitsaanerulersitsinissamut atorsinnaasarput - maannakku siunissamilu.

Piffissaq najummassimanartoq unammillernartorsiorfiusorlu inuuffigaarput.

Aammalu nunat tamalaat akornanni ileqqut naleqartitallu taamaattussaannartut isumaqarfigisimasaraluagut maanna tatineqarput.

Nunanit pissaanilinnit tamat oqartussaaqataanerannik, assigiinngiiaarnermik kiffaanngissuseqarnermillu aaqqissuussisimanitsinnik sivisuumik akerlilersuisimasuinnarniunngitsoq - ajoraluartumilli aamma naatsorsuutigisimanngilluinnakkatta tungaaniit.

Nunarsuarmi pissaaneqarniunnerup uteqqinnera amerlasuunit oqaluuserineqarpoq, nunarsuarmi toqqissisimannginnermik pilersitsisoq, naalagaaffiit sakkussiarsuaateqarnermikkut nukittuut qanorluunniit iliorsinnaasoriffiat, nunanut mikinerusunut qunusiarinnillutik, naalagaaniarlutik naqisimanninniarlutillu.

Nunarsuarmi taamaattumi ataatsimoorfigisinnaasatsigut ataatsimoortariaqarpugut.

Piviusorsiortariaqarpugut. Sammivillu sorleq ingerlavigerusunnerlutigu erseqqissumik oqaatigisinnaasariaqarparput.

Uanga qularutiginngilluinnarpara, Kalaallit Nunaat, Danmark aamma Savalimmiut ataatsimoorunik angusassaqarnerpaasut.

Naalagaaffeqatigiittut, ataatsimoornermik siunissaqartumi.

Inatsisartutta marluk akornanni siunissami suleqatigiilluartoqarnissaanut qilanaarpunga.

Siulittaasoqarfik sinnerlugu - uummammit pisumit Folketingimut tikilluaqqoqqippakkit!

Større