Assiliisartoq: Ólafur Steinar Rye Gestsson

Naggataarutaasumik oqallinneq ministeriunermut Mette Frederiksenimut (S) apeqquteqaateqarluni oqallinnertut ingerlanneqassaaq. Nallinginnaasumik naggataarutaasumik oqallinneq apeqquteqaateqarnermik aallaveqartarpoq. Ukioq manna apeqquteqaatit marluk ataatsimoortillugit oqallisigineqassapput. Aappaa nunami namminermi nunanullu allanut politikkimi pissutsit tunngasuussaaq.  Aappaa tassaassalluni Danmarkip siunissaa pillugu Naalakkersuisut pingaarnertut takorluugaat.
 
Apeqquteqaatit tunngavilersorneqaqqaassapput, kingornatigullu ministeriunerup tamaasa akissuteqarfigissavai. Ministeriuneq akissuteqareerpat politikkikkut oqaaseqartartut oqaaseqassapput, ataasiakkaarlutillu oqaaseqartartutut oqaasissatik saqqummiussuutissavaat. Oqaaseqartartup oqalungiareerneri tamaasa oqallittoqartassaaq, folketingimi ilaasortat oqaaseqartumut aperisinnaassallutik. Oqaaseqartartut oqaaseqareerpata, taava ilaasortat atlantikup avannaaneersut oqaaseqassapput. Naggasiutigalugu ministeriuneq oqaluttarfimmut qaqeqqissaaq.

Politikkikkut sammisat tamarmik, naalagaaffiup iluani pisut nunanullu allanut tunngasut, oqallisigineqarsinnaapput. Amerlasuutigulli naggataarutaasumik oqallinneq piffissap sivikitsup iluani sammisanut aalajangersimasunut ikittunut sammisaqarfiulersarpoq.

Naggataarutaasumik oqallinnerup nalunaarpaa, folketingip ukiuani 2024-25-mi Folketingip ataatsimiittarfiani ataatsimiinnerit pilersaarutaasut naammassingajalernerat. Ataatsimiittarfimmi ulloq ataatsimiiffissaq kingulleq tassaavoq pingasunngorneq 11. juni. Taamatuttaaq ataatsimiittarfimmi 9. september 2025 ataatsimiittoqassaaq, 2026-imut aningaasanut inatsisissaq siullermeerlugu oqaluuserineqassammat.

Naggataarutaasumik oqallinneq malinnaaffigiuk

Naggataarutaasumik oqallinnerup nalaani kalaallit ilaasortat marluk oqaaseqartartutut ilanngussaat tassungalu atatillugu naatsumik oqaaseqaatigineqartut toqqaannartumik kalaallisuumut kalaallisuumiillu nutserneqassapput. Kalaallit ilaasortat taakku naatsumik oqaaseqaatigiumaagaat aamma toqqaannartumik kalaallisuumut kalaallisuumiillu nutserneqassapput.

Naggataarutaasumik oqallinneq Folketingip TV-iatigut aallakaatinneqassaaq ussersorluni nutserneqartumik aamma ussersorluni nutserneqanngitsumik.